Bakı şəhər sakini D.Ağayevanın 500 manatını dələduzluq yolu ilə almaqda şübhəli bilinən paytaxt sakini Elçin Həsənov Nizami RPİ 25-ci PB-nin əməkdaşları tərəfindən saxlanılmışdır.

Martın 13-də Qaradağ rayonunun Lökbatan qəsəbəsindəki evlərin birinin həyətindən su qızdırıcısı, təmir-tikinti aləti, 2 ədəd pəncərə və qapı çərçivəsi oğurlamaqda şübhəli bilinən Bakı şəhər sakini Vahid Novruzov Qaradağ RPİ 10-cu PB-nin əməkdaşları tərəfindən saxlanılmışdır.

Bakı BPİ-nin Metropolitendə Polis Şöbəsi əməkdaşlarının keçirdikləri əməliyyat-axtarış tədbirləri nəticəsində ötən il dekabrın 2-də metronun “28 May” stansiyasının platformasında Lerik rayon sakini Fatimə Məmmədzadənin cibindən mobil telefon oğurlamaqda şübhəli bilinən Şirvan şəhər sakini, əvvəllər məhkum olunmuş Valeh Nəcəfov saxlanılmışdır.

Martın 13-də saat 23 radələrində paytaxtın Nizami rayonunun M.Şərifli küçəsində müəyyən edilməmiş avtomobillə yolu keçən Bakı şəhər sakini Tofiq Sarıyev vurulmuşdur. T.Sarıyevə xəstəxanada ilkin tibbi yardım göstərildikdən sonra buraxılmışdır. Nizami RPİ 25-ci PB əməkdaşlarının keçirdikləri əməliyyat-axtarış tədbirləri nəticəsində yol qəzasını törədərək hadisə yerindən yayınmaqda şübhəli bilinən “Volkswagen” markalı avtomobilin sürücüsü - Bakı şəhər sakini  Ruslan Talıbzadə saxlanılmışdır. Nizami RPİ tərəfindən araşdırma aparılır.

Qaradağ RPİ 11-ci PB əməkdaşlarının keçirdikləri əməliyyat tədbirləri nəticəsində martın 12-də Qobustan qəsəbəsindəki evlərin birindən 845 manat pul və 1500 manat dəyərində qızıl əşyalar oğurlamaqda şübhəli bilinən Bakı şəhər sakinləri Nahid Həmidov və Amil Nəcəfli saxlanılmışlar.